!!!

Ég fékk að gjöf frá ágætisvini mínum bók sem heitir: The more I see of men, the more I love my cat. Þeir sem þekkja mig vita væntanlega að ég er ekki mikil kattakona...

Og, þetta sem ég sagði um bílinn um daginn er greinilega rétt, það er alveg á hreinu að hann er eitthvað að skjóta sér í bifvélavirkjanum. Nú er framrúðan sprungin!!!

Blessaður bíllinn

Ég er að spá í að fara fram á að fram fari rannsókn á fjármálum heimilisins og ætlast til að að bíllinn taki ábyrgð á 50faldri þennslu síðustu mánaða. Þarfasti þjónninn minn er held ég skotinn í bifvélavirkjanum og ég er búin að fara með hann á verkstæðið þrisvar sinnum á fjórum mánuðum til að láta dytta að honum.

Sundnámskeið

Óðinn byrjaði á sundnámskeiði í dag. Við ætlum að fara í þessa tíma í hádeginu á fimmtudögum. Honum fannst alveg ótrúlega gaman og brosti bara hringinn allan tímann sem við vorum í lauginni. Mér fannst líka mjög gaman og líst vel á þessa tíma, kennarinn er mjög hress og skemmtileg stelpa, og krakkarnir gera allt sem hún biður um. Það eina sem mér finnst skrítið er að það eru ekki sér skiptiklefar fyriri konur og karla! Það fara allir inn á sama svæðið og svo eru litlir klefar þar inni sem maður fer inn í og skiptir yfir í sundfötin. Þá þarf maður að bera allt draslið að skápunum og svo er bara labbað beint út í laug ... það þvær sér enginn áður en þeir fara í laugina!!! Mér finnst það heldur subbó, verð bara að segja það. Svo er náttúrulega ekki hægt að þvo sér almennilega í sturtunum, því þær eru sameiginlegar líka!!! Ég fatta þetta bara engan veginn. Það væri minnsta mál að gera þetta að tveim aðskildum svæðum. En, þetta skiptir ekki máli. Mestu skiptir að Óðinn er rosalega ánægður með að fara í sund og ég er glöð að geta farið með honum ... þvæ mér bara vel þegar ég kem heim ;o)

Skólaskylda!

Skólaskylda byrjar hér í Englandi skólaárið sem börn verða fimm ára. Ég fékk bréf frá skólayfirvöldum þess efnis að nú skyldi ég velja skóla fyrir Óðinn og að umsóknarfrestur sé 16. október. Þetta er allt mjög flókið og ég er nú með lista af skólum sem eru frá 0.8 - 1.4 mílna fjarlægð frá húsinu sem við búum í, þar þarf ég að fara í heimsókn á opna daga og hlusta á hvers vegna ég skuli velja þennan skóla en ekki hinn. Þeir taka inn nemendur í tveimur hópum og Óðinn byrjar í janúar 2010. Ég fór í fyrstu heimsóknina í morgun og leist bara ágætlega á skólann, krakkarnir virtust kát og sátu voða stillt í tímunum. Ég á eftir að fara í fimm skóla í viðbót, svo það verður spennandi að sjá hvort það sé einhver munur á þeim.

Það er fyrsti í sundnámskeiði hjá okkur mæðginum í hádeginu á morgun :)

Helgin

Það var mjög gott veður um helgina og við mæðgin nutum þess í botn. Óðinn er orðinn mjög skæður á hjólinu sínu og ég hleyp sveitt á eftir honum. Við tókum því bara rólega, fórum í hjóla/hlaupatúra, slógum grasið í garðinum og fórum til Ashridge í gönguferð um skóginn. Óðinn er á algjöru klifurskeiði þessa dagana og ég þurfti að elta hann upp um allt til að passa að hann færi sér ekki að voða. Hann var líka mjög stoltur að geta kennt mér að hoppa á einum fæti! Mjög gaman.

Hvað er klukkan?

Óðinn kom upp í rúm til mín í morgun klukkan sex. Ég var að reyna að sannfæra hann um að það ætti alls ekki að fara á fætur fyrr en í fyrsta lagi klukkan sjö, svo hann sneri bara vekjaraklukkunni á hvolf og þá var hún orðin níu! Honum fannst þetta rosalega fyndið - og mér reyndar líka, þó ég sé engin brandarakelling svona snemma á morgnana.

Annars er ég nýkomin heim. Fór í mæðraorlofshelgarferð til Íslands, hitti líffræðigengið, fór á þátíðarhitting með gamla gagnfræðaskólaárgangnum mínum og hitti fjölskylduna í mýflugumynd. Þetta var ótrúlega skemmtileg ferð, gaman að hitta gamla vini og nýja.

Handbolti og PCR

Halló halló, ég er á lífi ... og rúmlega það eftir að hafa vaknað í morgun til að horfa á handboltann. Þetta var kannski ekki skemmtilegasti handboltaleikur sem ég gef séð, var alveg búin að gleyma hvað það er gaman að horfa á handbolta, en magnað hjá strákunum að vinna silfrið. Ég er ekki viss um að það sé manni hollt að lenda í svona geðshræringu snemma morguns!

Óðinn er hjá pabba sínum um helgina, svo ég skellti mér í vinnuna af gömlum vana og var þar að slást við PCR maskínuna þar til klukkan níu í kvöld. Ég held ég hafi náð áfangasigri í þeirri viðureign, eða vona það allavega. Fyrir þá sem ekki vita hvað PCR er, þá bara skiptir það engu máli, nægir að segja að það tekur langan tíma og virkar ekki alltaf sem skildi ;o)

Pólskt súkkulaði og skrímsli

Ég er mætt aftur til Englands og tók með mér Prince Polo til að gefa vinnufélögunum. Þetta var aðallega gert vegna þess að einn úr vinnuhópnum er pólskur og honum finnst mjög fyndið að Prince Polo sé til á Íslandi.

Hann bætti síðan um betur og lét bróður sinn koma með "Grzeski" handa mér, sem er eiginlega betri útgáfa af Prince Polo. Alveg eðal súkkulaði, gæti alveg torgað heilum kassa.

Óðinn er með skrímslaæði þessa dagana, sem er í góðu lagi, nema fyrir það að hann er viss um að það séu skrímsli í skápum og undir rúmi þegar hann fer að sofa ...

Mömmuklúbbur

Við Óðinn erum að fara í afmælishitting í mömmuklúbbnum mínum á morgun. Krakkarnir eru allir að verða þriggja ára í júní og júlí. Við ætlum að fara með þau í boltaland og síðan koma allir heim til okkar. Ég verð að sjálfsögðu með miklar veitingar í boði, skrapp í Sainsbury´s áðan og keypti upp kökubirgðirnar þeirra ;-)

Úff, rosalega er langt síðan ég skrifaði eitthvað. Það er búið að vera mikið um að vera. Auður kom í heimsókn eina helgi. Við náðum aðeins að kíkja í búðir frænkurnar, það gekk alveg ágætlega hjá okkur ;) Stuttu seinna kom mamma, og pabbi þar á eftir. Þau héldu heimili fyrir mig í 10 daga. Það var algjör lúxus, maturinn tilbúinn þegar við Óðinn komum heim á daginn og sjálfvirkur uppvaskari (mamma) og garðyrkjumaður (pabbi). Ég er að spá í að flytja þau bara inn.

Það er líka fjör í náminu að vanda. Allar tilraunir í gangi í einu og ég á eftir að enda eins og vísindamaðurinn í "Back to the Future" með hárið út um allt og kannski yfirvaraskegg líka, hver veit. Bilun. Svo voru skólaheimsóknir um daginn. Við fórum með krakkana í pödduleit. Það var alveg frábært, þau voru svo áhugasöm.

Óðinn hlakkar mikið til afmælisins síns og talar endalaust um hvenær hann verði þriggja ára. Stór strákur!

Frægð og frami ;o)

Það er mynd af mér á fréttasíðu Porter Alliance og í nýja bæklingnum þeirra. Þetta eru samstarfsaðilar okkar, en þeir hafa samt ekkert með verkefnið mitt að gera - og ég hef ekki hugmynd afhverju þeir settu mynd af mér... held það hafi verið af því að ljósmyndarinn var svo ánægður með rauðu peysuna mína sem mótvægi við græn laufin á trjánum. Mjög vísindalegt allt saman.

Afmælisplön og fleira

Ég er búin að sitja við boðskortaskriftir í kvöld. Ég ætla að halda upp á afmælið hans Óðins 13. júlí og nú eru allir beðnir að biðja til veðurfræðinganna um sól og gott veður! Planið er að vera með liðið úti í garði, leigja hoppukastala, fara í kónga og aðra leiki. Það var frekar erfitt að takmarka gestalistann, svo þetta verða kannski of margir, en það hlýtur að reddast ... vona bara að það rigni ekki, því það er ekki pláss fyrir alla inni hjá okkur. Óðinn er mjög spenntur og talar um afmælið sitt á hverjum degi. Nú verð ég að standa mig og byrja að eyða brenninettlum úr garðinum og merkja kanínuholurnar, svo fólk hrynji ekki ofan í þær!

Óðinn er mikill athafnamaður og var alls ekki á því að við ættum að vera neitt inni við í dag, því við þyrftum sko að vinna í garðinum - "because it´s not growing properly!". Ég verð að segja að ræktin í garðinum er svo góð að ég heyri "blessað" grasið vaxa, að ekki sé talað um arfann út um allt. Hann er líka búinn að suða svo lengi um að við setjum upp matardall fyrir fuglana, að ég lét það loksins eftir honum í dag. Svo stóð hann fyrir neðan greyjið og kallaði hástöfum á fuglana að hann væri búinn að setja út hádegismat fyrir þá, en skildi svo ekkert í að þeir flokkuðust ekki til hans.

Það er líka búið að vera nóg að gera undanfarið og gaman. Auður kíkti í heimsókn um helgina, og við áttum góða daga saman frænkurnar. Svo er mamma að koma á miðvikudaginn og pabbi væntanlegur fljótlega á eftir henni. Alltaf nóg að gera og skemmtilegt í Álmkoti!

Hér er búin að vera alveg ótrúleg blíða síðan á föstudag, ég er búin að draga fram sumarfötin og þurfti að slást við að slá blettinn líka. Grasið náði í mitti (á Óðni) og ég held ég hafi gert útaf við sláttuvélina...

Annars er það helst að frétta að Óðinn datt niður stigann á föstudagskvöldið, frá toppi og alla leið niður. Þetta leit mjög illa út, þar sem hann fór með höfuðið á undan, en hann slapp nokkuð heill frá þessu. Við fórum upp á slysó til að láta athuga hvort það væri allt í lagi. Honum fannst það mjög spennandi, en mér fannst það síður, föstudagskvöld á slysavarðstofum eru ekki fyrir börn! Þegar ég fór að ræða þessar ófarir við vini og kunningja, þá er þetta eitt það algengasta sem börn (og fullorðnir) slasa sig á hér, enda stigar í flestum húsum í Bretlandi. Allavega, þá verða hliðin áfram fyrir stiganum hjá okkur og Óðinn fær ekki lengur að fara einn upp og niður.

Já og ég er líka loksins búin að bóka sumarfríið. Við komum heim 15. júlí og verðum í tvær vikur!

Fiðrildi

Við Óðinn rekum fiðrildagildru í garðinum þessa vikuna. Þetta er ljósgildra sem fiðrildin (moths) safnast að yfir nóttina og við tökum þau lifandi og setjum í búr. Það stendur yfir svokölluð "smádýravika" í vinnunni, en þá koma skólahópar að hitta vísindamenn/konur og við förum með þau í víðavangsferðir, þar sem við söfnum hryggleysingjum fyrir þau að skoða. Við erum líka með stórt búr sem þau fá að fara inn í og þar eru fiðrildin sem við Óðinn söfnum. Þetta hefur gengið alveg stórvel hjá okkur, Óðinn er mikill veiðimaður. Það varð reyndar smá óhapp fyrsta morguninn, ég var alveg að verða búin að tæma gildruna þegar Óðinn fór að segja mér frá fljúgandi "býflugum" ... hann hafði opnað búrið og hálfur fengurinn hafði sloppið! En hann er mjög passasamur með þetta síðan þá og veit alveg hvernig á að fara að þessu - og þekkir muninn á býflugum og fiðrildum!!!

Hérna er strákurinn mjög stoltur með litla búrið við hliðina á ljósgildrunni.

Jarðskjálfti

Ég sá á netinu í dag að það hafi orðið annar Suðurlandsskjálfti. Þó það hafi verið tekið fram að engin stórslys hafi orðið á fólki, þá fannst mér óþægilegt að vera svona langt í burtu, sérstaklega þar sem upptökin voru á mínum heimaslóðum. Ég er búin að heyra í og af fjölskyldunni og veit að þar eru allir heilir. Vona að allir hafi það sem best.

Tónlist í rigningu

Ég var í úti á túni að leita að blaðlúsum í dag með spilarann í eyrunum að venju og komst að því að Edith Piaf er flott á svona degi. Það er allt grátt og svona úði sem kemst allstaðar inn undir. Sem betur fer var ég með linsur, því gleraugu virka engan veginn í svona úða. En allavega, þá var Piaf góður félagi í rigningunni.

Skýrslan

Skýrslan um ágengu tegundirnar og flokkunarfræði er komin út á netinu: Invasive species management: what taxonomic support is needed? Hún er gefin út af Global Invasive Species Programme.

Setti slóðina inn svo þið getið lesið hana ykkur til dundurs...

Aberdeen

Ég var að koma heim af ráðstefnu í Aberdeen. Ég hafði ekki farið svo norðarlega í Skotlandi áður og mér fannst ég vera komin hálfa leiðina heim til Íslands. Það var mjög kunnuglegt að vakna við mávagarg og köll í tjaldi, finna sjávarloftið, nú og svo var líka kaldara og meira rok alveg eins og heima. Ráðstefnan var mjög fín, það voru 38 fyrirlestrar á einum og hálfum degi, svo ég er vel þreytt núna. Fyrirlesturinn gekk alveg ágætlega, ég fékk nokkrar góðar spurningar og svo voru ágætis umræður um verkefnið mitt seinna.

Borgin var allt í lagi, fallegur granítsteinn í húsunum, en niðri við höfnina var mikið af sjóarakrám og ég er ekki viss um að ég myndi labba þar um eftir myrkur. Ráðstefnuhaldarar fóru með okkur að Dunnottar, mjög fallegum kastala, þar sem við gengum um í um klukkutíma og fórum síðan á veitingastað í sjávarbæ sem heitir Stonehaven.

Þetta var mjög fín ferð og ég hitti mikið af góðu fólki, en ég hlakka líka mikið til að fara og ná í Óðinn í fyrramálið, er búin að sakna hans óendanlega.

Chelsea Flower Show

Ég var að vinna á standinum okkar á Chelsea Flower Show í dag. Okkar standur er partur af símenntunarhluta sýningarinnar og það var mikið af fólki sem kom og talaði við okkur, bæði um víðitrén og vísindin, svo það var mjög gaman. Það er aðallega áhugafólk um garðrækt sem sækir sýninguna, en fólk kemur allstaðar að úr heiminum. Fólk er orðið mjög meðvitað um græna orku og margir farnir að huga að því að verða sjálfbærir með orku fyrir heimilin.

Svo spillti ekki að standurinn fékk "Gull", sem er hæsta einkun sem dómararnir gefa :)

Kíkið á slóðina hérna: Chelsea Flower Show þar sem er mynd af standinum og á listann yfir verðlaunahafa (við erum undir "Continuous learning").

Skýrsla

Ég fékk símtal í gær frá fyrrverandi vinnuveitanda. Hann var að segja mér að skýrsla sem ég skrifaði fyrir um tveimur árum á að koma út á mánudaginn. Ég var alveg búin að gefa upp von með að hún yrði nokkurn tímann birt, svo ég er að sjálfsögðu mjög kát með þetta.

Annars er ekkert merkilegt að gerast þessa helgina. Ég er í vinnunni að undirbúa fyrir Chelsea Flower Show, þar sem grúppan er með stóran stand um víði og "græna orku". Við erum að kynna rannsóknirnar sem við erum að gera og það verða m.a. búr með blaðlúsum til að sýna fólki. Drottningin labbar víst um svæðið á mánudaginn (sýningin opnar fyrir almenningi á þriðjudaginn), og ég vil endilega að kella sjái gæludýrin mín ;)

Það er hópur úr vinnunni að fara á indverskan veitingastað í kvöld, svo ég skelli mér kannski með ... fer eftir hvenær ég klára á labbanum ...